Hamilton frábær í Bandaríkjunum

Lewis Hamilton ók frábærlega í bandaríska kappakstrinum í gær þegar hann kom í mark á undan Sebastian Vettel. Fernando Alonso stóð á verðlaunapallinum með þeim en þetta var í fyrsta sinn sem þessir þrír ökuþórar deildu verðlaunapallinum.

En það voru Felipe Massa og Jenson Button sem voru frábærir líka. Massa ræsti ellefti og Button ræsti tólfti en þeir náðu að vinna sig upp í fjórða og fimmta sæti. Þeir þurftu líka að hafa mikið fyrir því.

Blaðamaður Vísis hefur gefið ökumönnum einkunnir í samræmi við frammistöðu þeirra í kappakstrinum.

Nokkrir punktar

1. Lewis Hamilton

Hamilton ók frábærlega í Bandaríkjunum. Antony Hamilton, faðir Lewis, sagði að þetta hefði verið besta frammistaða Hamilton á ferlinum. Lewis var einnig mjög ánægður með sjálfan sig eftir að hann kom í mark enda ekki á hverjum degi sem Sebastian Vettel þarf að láta í minni pokann.

2. Sebastian Vettel

Red Bull-liðið vann heimsmeistaratitil bílasmiða í Bandaríkjunum. Vettel gerði það sem hann þurfti til að láta það verða að veruleika. En eftir að hafa ræst fremstur var búist við að hann myndi vinna mótið og tryggja sér heimsmeistaratitilinn. Red Bull-bíllinn er eftir allt saman lang rennilegasti bíllinn á ráslínunni. Vettel hlýtur að vera ónánægður með að hafa ekki klárað dæmið í Bandaríkjunum.

3. Fernando Alonso

Alonso heldur áfram að koma á óvart í Ferrari-bílnum. Sé Alonso gefið verkefni mun hann klára það og gera enn betur en ætlast var til. Alonso ræsti kappaksturinn í sjöunda sæti en var kominn í það fjórða eftir fyrstu beygju. Hann hélt því svo til enda og ók fanta vel og endaði þriðji.

4. Felipe Massa

Massa hefur fallið í skuggan af Alonso í allt sumar. Í vor var meira að segja rætt um að hann væri á förum frá Ferrari. En hann hefur snúið þessari vertíð úr vonbrigðum í eitthvað sem hann getur verið nokkuð sáttur með. Massa ók úr ellefta sæti endaði fjórði eftir að hafa háð frábæra baráttu á brautinni.

5. Jenson Button

Button sýndi enn og aftur hversu fágaður ökuþór hann er. Hann ræsti aðeins tólfti því bíllinn bilaði í miðjum tímatökum á laugardaginn en hann lét það ekki á sig fá, mætti jákvæður til leiks í gær og ók á yfirvegaðan máta í mark í fimmta sæti. Þá verður að minnast á það hversu frábæran skilning Button hefur á kappakstrinum og hvað hann hugsar mikið undir stýri. Hann er alltaf með það á hreinu hvar keppninautarnir eru í kappakstrinum.

13. Nico Rosberg

Mercedes-bíllinn lét illa af stjórn í tímatökunum á laugardaginn. Rosberg var látinn aka gamalli gerð Mercedes-bílsins en Schumacher þeirri nýju. Rosberg kláraði kappaksturinn í þrettánda sæti, sem undir venjulegum kringumstæðum mundi ekki teljast ásættanlegt en sé litið til þess að hann ræsti sautjándi verður árangurinn að teljast góður.

15. Michael Schumacher

Gamli heimsmeistarinn tók þátt í sínu næst síðasta móti á ferlinum um helgina og heillaði ekki. Hann ræsti fimmti eftir að hafa ekið frábæran hring í tímatökum en féll hratt niður listann í kappakstrinum. Hann lauk mótinu tveimur sætum á eftir liðsfélaga sínum - í fimmtánda sæti. Það eru léleg úrslit frá sjöföldum heimsmeistara.