Podolski strax farinn að tala um að fá sér Arsenal-húðflúr

Þjóðverjanum Lukas Podolski líkar lífið hjá Arsenal enda þegar farinn að skora reglulega fyrir Lundúnaliðið. Podolski skoraði sitt þriðja mark í síðustu þremur leikjum í sigri á Montpellier í Meistaradeildinni í vikunni.

„Allir hjá Arsenal sáu til þess frá fyrsta degi að vistaskiptin voru mér auðveld. Það voru ekki bara leikmennirnir, þjálfararnir eða aðstoðarmennirnir heldur tóku allir starfsmenn félagins mér fagnandi," sagði Lukas Podolski en hann kom til Arsenal frá Köln í sumar.

„Við höfum bara spilað fjóra eða fimm leiki og ég er mjög ánægður að vera strax kominn með þrjú mörk. Ég er mjög sáttur með þessa góðu byrjun hjá mér sem og öllu liðinu," sagði Podolski.

„Við spiluðum afar vel um síðustu helgi. Ég vil spila svona fótbolta, eins til tveggja snertinga bolta með að það alltaf í huga að sækja beint á markið. Við höfum samt aðeins spilað fjóra leiki og getum ekki farið að tala um neina titla strax," sagði Podolski.

Lukas Podolski er með Köln-húðflúr innan á hægri hendi sinni og hann er strax farinn að huga að því að fá sér Arsenal-húðflúr.

„Köln skiptir mig svo miklu máli því ég var þar svo lengi. Kannski mun ég líka fá mér Arsenal-húðflúr í framtíðinni því ég kann svo vel við þennan klúbb. Þetta er stórt félag og hver veit nema að ég fái mér Arsenal-húðflúr en það verður þá eftir nokkur ár," sagði Lukas Podolski.