Keflavík og Snæfell geta orðið Lengjubikarmeistarar í kvöld

Í kvöld verður spilað um fyrsta bikar vetrarins í kvennakörfunni þegar Keflavík tekur á móti Snæfelli í úrslitaleik Lengjubikarsins en spilað er í Toyota-höll þeirra Keflvíkinga. Þrjú lið sóttu um að halda úrslitaleikinn og ákvað stjórn KKÍ að fela Keflavík umsjónina með leiknum. Leikurinn hefst kl. 19:15.

Keflavík og Snæfell unnu bæði alla fjóra leiki sína í riðlinum og bæði lið voru búinn að tryggja sér sæti í úrslitaleiknum fyrir lokaleikinn. Keflavík skildi eftir KR, Njarðvík, Grindavík og Stjörnuna í sínum riðli en Snæfell hafði betur gegn Val, Haukum, Fjölni og Hamar.

Þetta er í ellefta skipti í þrettán ára sögu Fyrirtækjabikars kvenna sem Keflavíkurkonur komast í úrslitaleikinn en þær hafa unnið þennan bikar alls sex sinnum. Snæfell er aftur á móti að spila sinn fyrsta úrslitaleik í Fyrirtækjabikarnum og getur ennfremur unnið fyrsta titil kvennaliðs félagsins í kvöld.

Fyrirtækjabikarmeistarar kvenna frá upphafi:

2000 KR

2001 Grindavík

2002 Keflavík

2003 Keflavík

2004 Keflavík

2005 Haukar

2006 Haukar

2007 Keflavík

2008 Keflavík

2009 KR

2010 Keflavík

2011 Haukar

2012 Keflavík eða Snæfell