Hafdís: Ég er í skýjunum | Frábær afmælisdagur

„Afmælisdagurinn í fyrra var líka mjög góður. Þá var ég að keppa í Svíþjóð og bætti mig í 60 metra hlaupinu. Svo hittir þetta aftur á afmæli og var alveg frábært," sagði Hafdís Sigurðardóttir úr UFA eftir að hafa tryggt sér sinn fjórða Íslandsmeistaratitil á Meistaramóti Íslands.

Hafdís varð Íslandsmeistari í 60 metra, 200 metra og 400 metra hlaupi auk þess að stökkva kvenna lengst í langstökki. Áhorfendur sungu fyrir hana afmælissönginn þegar hún hlaut gullverðlaun í 200 metra hlaupinu en Hafdís er 25 ára í dag.

„Svo vona ég að það gangi vel í 4x400 metra boðhlaupinu á eftir," sagði Hafdís en viðtalið var tekið fyrir boðhlaupið. UFA bar þar sigur úr býtum og vann Hafdís þar með sín fimmtu gullverðlaun um helgina.

Hafdís bætti árangur sinn í öllum hlaupagreinunum auk þess að vera nálægt sínu besta í langstökkinu.

„Þetta datt allt mín megin þessa helgina sem er frábært. Að verða Íslandsmeistari er auðvitað frábær titill að bera en að fá fjóra og á sjálfan afmælisdaginn, ég er í skýjunum," sagði Hafdís sem saknaði helsta keppinautar síns um helgina - hlaupakonuna Hrafnhildi Eir Hermóðsdóttúr úr ÍR sem átti ekki heimangengt vegna meiðsla.

Árangur Hafdísar um helgina er ekki síst athygliverður í ljósi þess að hún glímdi við veikindi í vikunni.

„Ótrúlegt en satt þá var ég slöpp síðustu tvo daga fyrir mót. Hálf óglatt, með hausverk og lá eiginlega bara í rúminu. Ég mætti svo hingað í gær og vonaði það besta," sagði Hafdís.

Bágborin aðstaða en árangursríkar æfingar

Hafdís er greinilega í hörkuformi enda að bæta sig í þremur greinum af fjórum. Hún segir að æfingar hafi gengið virkilega vel í vetur og hún hafi verið laus við meiðsli.

„Það er auðvitað erfitt að æfa fyrir norðan því við höfum ekki aðstöðu í líkingu við þessa. Maður lætur þetta samt ganga, vinnur með það sem maður hefur og það gengur vel," sagði Hafdís.

Aðstaða norðanmanna takmarkast við fjórar 100 metra hlaupabrautir í knattspyrnuhúsinu Boganum á Akureyri þar sem er einnig aðstaða fyrir langstökk og stangarstökk.

„Húsið er kalt, lítil upphitun svo við erum kappklædd. Svo kemur maður hingað í hitann og rífur sig úr öllu. Maður veit ekkert hvernig maður á að vera," sagði Hafdís og hló. Hún sagði það hjálpa að frjálsíþróttafólkið hefði lyftingaaðstöðu á Bjargi og hægt væri að komast á mýkra gólf í Íþróttahöllinni.

Í leit að fjárhagsstuðningi

Hafdís hefur hug á að keppa erlendis síðar í mánuðinum en það sé háð því að takist að fjármagna ferðalagið. Keppniskonan leitar logandi ljósi að styrktaraðilum.

„Það eru engin fyrirtæki að aðstoða mig við fjármögnun. Það er bara ég með aðstoð fjölskyldunnar sem stendur við bakið á mér. Það er eiginlega ótrúlegt hvað við komumst í gegnum," segir Hafdís sem vonast til þess að komast á HM í frjálsum í mars þar sem hún myndi keppa í 400 metra hlaupi.

„Þess vegna er ég að keppa í 400 metra hlaupi. Ég hef lítið æft það undanfarið en get hlaupið það nokkuð hratt svo ég ætla að negla á það. Það þýðir ekkert annað," segir Hafdís sem þarf þó ekki að ná lágmarkinu til þess að öðlast þátttökurétt. Hún kæmist á mótið sem fulltrúi Íslands en það mun skýrast á næstu vikum.