Það var í byrjun apríl 2010 sem slitastjórn Glitnis höfðaði skaðabótamál gegn Jóni Ásgeiri Jóhannesyni, Lárusi Welding, fyrrverandi forstjóra Glitnis, Pálma Haraldssyni og þremur fyrrverandi starfsmönnum Glitnis.
Málið snýst um lánveitingu Glitnis til félagsins FS-38 ehf. sem var dótturfélag Fons, félagi Pálma, upp á sex milljarða króna hinn 16. júlí 2008 til að kaupa 30 prósenta hlut í Aurum Holdings Ltd. af Fons. Aurum Holdings er einn stærsti skartgripasali Bretlands og á m.a skartgripakeðjuna Goldsmiths, en slitastjórn Glitnis telur yfirverð hafa verið greitt fyrir hlutabréfin.
Að mati slitastjórnar Glitnis var verðið á hlutabréfunum ákveðið samkvæmt tölvupósti sem Jón Ásgeir sendi á Bjarna Jóhannsson, viðskiptastjóra hjá Glitni, Lárus Welding og Pálma Haraldsson.
Í skaðabótamálinu voru dómkvaddir matsmenn til að meta verðið á Aurum Holdings en það eru þeir Gylfi Magnússon, dósent við viðskiptafræðideild HÍ, og Bjarni Frímann Karlsson, lektor, en hann situr jafnframt í rannsóknarnefnd sparisjóðanna, og eiga þeir að skila mati sínu hinn 20. janúar næstkomandi.
Samtímis skaðabótamálinu fór fram kyrrsetning í eignum Lárusar og Jóns Ásgeirs hér á landi vegna málsins en þeir hafa reynt að hnekkja þeirri kyrrsetningu í sjálfstæðu máli og er fyrirtaka í því í Hæstarétti á miðvikudaginn.
Á sama tíma og skaðabótamál var höfðað í apríl 2010 kærði slitastjórn Glitnis málið til sérstaks saksóknara sem hefur haft það til rannsóknar vegna gruns um umboðssvik. Að sögn Ólafs Þórs Haukssonar, sérstaks saksóknara, er rannsóknin langt komin.

Jón Ásgeir ber ekki ábyrgð á lánveitingunni að lögum og Lárusi var aldrei skylt að fara eftir fyrirmælunum því Jón Ásgeir var ekki yfirmaður hans og ekki í stjórn Glitnis, en æðsta ákvörðunarvald hjá hlutafélagi milli aðalfunda liggur hjá stjórn þess og forstjóra. Velta má fyrir sér hvort Lárus hafi áttað sig á því að hann gat í raun virt alla tölvupósta frá Jóni Ásgeiri að vettugi, enda hafði hann enga stöðu hjá Glitni.

Hróbjartur segir þó að slitastjórn Glitnis muni ekki fallast á að málinu verði frestað fram í hið óendanlega dragist rannsókn sérstaks saksóknara mikið á langinn.
„Ef það kemur ekki niðurstaða í opinbera málið innan hæfilegs tíma verður málið flutt. Það er miklu líklegra að afstaða sérstaks liggi fyrir fyrr en síðar. Því við létum öll gögnin til hans og það var búið að vinna mikið af hálfu Glitnis. Það kæmi mér ekki á óvart ef það kæmi fljótlega niðurstaða í það hvað hann vill gera, en hvort hann ákærir eða ekki, það er auðvitað ekki okkar að segja til um," segir Hróbjartur.