Ný auglýsing Njarðvíkinga: Ekkert klísturskjaftæði hér - myndband

Njarðvíkingar eru búnir að hysja upp um sig buxurnar og farnir að vinna leiki í Iceland Express deild karla. Liðið hefur unnið tvo síðustu leiki sína og er komið upp úr fallsæti og upp í 9. sæti í deildinni. Það er því léttara yfir mönnum og það má nú sjá dæmi um það inn á Youtube-vefnum.

Framundan er leikur Njarðvíkurliðsins á móti KR-ingum sem hafa einir liða í Iceland Express deildinni unnið alla sex leiki sína á árinu 2011.

Liðin mætast í Ljónagryfjunni í Njarðvík á föstudagskvöldið og til að auka stemmninguna fyrir leikinn þá tóku leikmenn og þjálfari Njarðvíkinga upp skemmtilega auglýsingu þar sem þeir skjóta aðeins á handboltaæði landsmanna síðustu vikurnar.

„Liðið tók sig saman um helgina og henti saman einni skemmtilegri auglýsingu líkt og forðum daga hérna í den," segir í frétt um auglýsinguna á heimasíðu Njarðvíkur en hana má sjá með því að smella hér fyrir ofan.