Snæfell styrkir sig

Snæfellingar hafa styrkt sig fyrir komandi átök í Iceland Express-deild karla og samið við serbneska leikmanninn Zeljko Bojovic.

Fram kemur á heimasíðu Snæfells að Bojovic er 30 ára gamall og tveggja metra hár. Hann hefur leikið í Evrópu við góðan orðstír undanfarin ár, síðast með Timisoara í Rúmeníu. Hann þykir alhliða og duglegur leikmaður.

Snæfellingar vonast til þess að Bojovic verði klár í slaginn þegar að liðið mætir Grindavík á útivelli á fimmtudaginn næstkomandi.

Snæfell er á toppi deildarinnar með 26 stig en Grindavík í öðru sæti með 24, rétt eins og KR. Keflavík er svo í fjórða sætinu með 22 stig en þessi lið hafa tekið dágóða forystu á önnur lið í deildinni.