Páll Axel: Miklu meiri karakter í liðinu

Grindavík komst í kvöld í úrslit bikarsins með því að leggja Hauka að velli. Þegar liðin mættust í deildinni á dögunum unnu Haukar sannfærandi sigur en Grindvíkingar létu það ekki endurtaka sig.

„Við vorum mjög slakir í síðustu tveimur leikjum en núna var miklu meiri karakter í liðinu. Við mættum tilbúnir og kláruðum dæmið. Þetta er hörkulið sem við vorum að spila við og þeir slátruðu okkur síðast á okkar eigin heimavelli," sagði Páll Axel Vilbergsson, leikmaður Grindavíkur.

„Við erum alltaf að læra, svona er bara boltinn. Svo lengi sem menn átta sig á að það þarf að laga eitthvað þá er þetta í lagi. Það kemur niðursveifla hjá öllum liðum og við gerum okkur fyllilega grein fyrir því," sagði Páll Axel sem er hæstánægður með að komast í úrslitaleikinn.

„Alltaf gaman að komast í höllina. Frábært íþróttahús Laugardalshöllin."