Keflvíkingar töpuðu gegn bandarískum leikmönnum í samningsleit

Karlalið Keflavíkur í körfuknattleik beið lægri hlut gegn liði On-Point frá Bandaríkjunum 97-69 í æfingaleik í Keflavík í gær.

Víkurfréttir greina frá úrslitunum á heimasíðu sinni. Lið On-Point er skipað bandarískum leikmönnum héðan og þaðan sem ferðast um heiminn í von um að komast að hjá félagsliðum.

Að sögn Víkurfrétta mátti sjá að Keflavíkurliðið væri að stíga sín fyrstu spor eftir langt frí. Þá þótti leikform Keflvíkinga í lakara lagi. Arnar Freyr Jónsson þótti standa upp úr hjá heimamönnum en hann er aftur genginn til liðs við Keflvíkinga eftir dvöl í Grindavík og Danmörku.

Lið On-Point ætlar að nýta Íslandsdvölina til hins ítrasta og spila þrjá leiki til viðbótar. Liðið leikur gegn Grindvíkingum í kvöld og framundan eru viðureignir gegn ÍR á laugardag og KR á sunnudag.