Snæfell fær til sín annan Kana

Snæfellingar hafa samið við bandaríska leikstjórnandann Brandon Cotton. Hann hittir fyrir landa sinn Quincy Hankins Cole sem gekk til liðs við Snæfell fyrir skemmstu.

Cotton er 26 ára, 181 sentimetrar á hæð og lék með Detroit Mercy háskólanum. Á heimasíðu Snæfells kemur fram að Cotton hafi verið valinn í úrvalslið deildarinnar á hans öðru ári í háskólaboltanum. Hann var með um 18 stig að meðaltali í leik í gegnum háskólaferilinn.

Cotton hefur komið víða við síðan að hann lauk háskólanámi sínu. Hann hefur spilað í Úkraínu, Þýskalandi, D-deildinni í Bandaríkjunum og í Dóminíska lýðveldinu. Hann þykir snöggur, með gott líkamsvald ásamt góðri yfirsýn, góður skorari og skytta að því er fram kemur á heimasíðu Snæfells. Þá þykir hann einnig sterkur varnarmaður.

Snæfellingar komust í undanúrslit Íslandsmótsins í fyrra en biðu lægri hlut gegn Stjörnunni.