Guðmundur fer frá Njarðvík til Þorlákshafnar

Guðmundur Jónsson, bakvörður Njarðvíkinga, hefur ákveðið að yfirgefa Njarðvíkurliðið og spila með nýliðum Þórs úr Þorlákshöfn í Iceland Express deild karla í körfubolta á næsta tímabili. Þetta kom fram á karfan.is.

Guðmundur er 27 ára gamall og er kominn með mikla reynslu enda búinn að spila í úrvalsdeild karla síðan tímabilið 2002 til 2003. Hann var með 12,1 stig og 3,0 fráköst að meðaltali í vetur en hafði verið með 10,6 stig og 4,2 fráköst tímabilið á undan.

Þetta er í annað skiptið sem Guðmundur yfirgefur Njarðvík og fer í Þór en sumarið 2008samdi hann við Þór á Akureyri og spilaði eitt tímabil með liðinu áður en hann snéri aftur til Njarðvíkur.

Þór vann 1. deildina með sannfærandi hætti á síðasta tímabili og er þetta fyrsti leikmaðurinn sem þjálfarinn Benedikt Guðmundsson fær til liðs við félagið fyrir næsta tímabil.