Umfjöllun: Sigurmark Atla á lokasekúndunni

Atli Rúnar Steinþórsson tryggði FH dramatískan sigur með síðasta kasti leiksins gegn Akureyri í kvöld. Lokatölur 21-22. Þetta var fyrsti leikur liðanna um Íslandsmeistaratitilinn en þrjá sigurleiki þarf til að verða meistari.

Atli skoraði sigurmarkið af línunni en rétt áður hafði Akureyri jafnaði leikinn.

FH-ingar byrjuðu með látum og náðu strax þriggja marka forystu. Ari Magnús Þorgeirsson fór mikinn og skoraði meðal annars fjögur af sex fyrstu mörkum FH. Hann lék lausum hala í horninu og vörn FH var líka góð.

Hún varði nokkur skot Akureyringa og fyrir aftan hana var Daníel Andrésson frábær. Akureyri skoraði ekki fyrr en eftir rúmar sex mínútur og sóknarleikur liðsins var ósannfærandi og hugmyndasnauður.

Eftir 20 mínútur var staðan 4-8 og lið Akureyrar ekki upp á sitt besta. Sérstaklega sóknarlega, vörnin var ágæt, en Daníel stal senunni. Hann varði 10 skot á 20 mínútum og alls 12 í hálfleiknum, þar á meðal víti frá Bjarna þegar leiktíminn var úti.

Staðan í hálfleik var 9-11 gestunum í vil.

Akureyri jafnaði strax í 11-11 en Ólafur Guðmundsson vaknaði þá loksins til lífsins og skoraði þrjú mörk í röð. Akureyri jafnaði aftur á móti strax aftur. Skemmtilegur og hraður leikur.

Þá fóru markmenn liðanna í einvígi. Sveinbjörn og Daníel vörðu báðir frábærlega á löngum kafla og lítið var skorað. Tíu mínútum fyrir leikslok var staðan 16-17 fyrir FH. Þegar Akureyri jafnaði svaraði FH strax aftur og komst í 17-19 þegar rúmar sex mínútur voru eftir.

Þegar rúmar fjórar mínútur voru eftir jafnaði Bjarni fyrir Akureyri sem var jafnframt manni fleira. Bæði lið skoruðu aftur og þegar þrjár mínútur voru eftir hafði Akureyri boltann, jafnt var í liðum og staðan var 20-20.

Akureyri fór í langa sókn sem lauk með markvörslu Daníels frá Heimi. FH missti boltann klaufalega frá sér og þegar rúm mínúta var eftir sótti Akureyri enn á ný.

Oddur fór í gegn en skaut framhjá markinu. Daníel lokaði markinu vel. FH fékk því boltann 49 sekúndum fyrir leikslok í stöðunni 20-20. Ólafur Guðmundsson skoraði þá gott mark og kom FH yfir.

Akureyri tók leikhlé þegar rúmar 20 sekúndur voru eftir. Bjarni náði skoti undir lokin sem Daníel varði vel en Hörður náði frákastinu og jafnaði leikinn

Níu sekúndur lifðu og FH tók leikhlé. Örn Ingi geystist að marki, Guðmundur Hólmar togaði hann niður og fékk rautt spjald fyrir vikið.

FH átti aukakast fyrir utan og Atli Rúnar fékk boltann á línunni og skoraði ótrúlegt mark og tryggði FH sigur. Ótrúlegur endir á ótrúlegum leik.

Lokatölur 21-22.



Akureyri - FH 21 - 22 (9-11)

Mörk Akureyrar (skot): Bjarni Fritzson 7/2 (13/3), Oddur Gretarsson 5 (10), Heimir Örn Árnason 3 (7), Hörður Fannar Sigþórsson 2 (3), Guðmundur Hólmar Helgason 2 (9), Daníel Einarsson 1 (1), Bergvin Gíslason 1 (3).

Varin skot: Sveinbjörn Pétursson 18 (40) 48%.

Hraðaupphlaup: 3 (Oddur, Guðmundur, Bjarni).

Fiskuð víti: 3 (Heimir, Guðlaugur, Hörður).

Utan vallar: 6 mínútur.

Mörk FH (skot): Ari Þorgeirsson 8 (11), Ólafur Guðmundsson 5 (13), Baldvin Þorsteinsson 3 (3), Ásbjörn Friðriksson 3/1 (6), Örn Ingi Bjarkason 2 (5), Atli Rúnar Steinþórsson 1 (3), Ólafur Gústafsson 9 (5).

 

Varin skot: Daníel Andrésson 19/1 (40) 48%)

Hraðaupphlaup: 2 (Ásbjörn, Baldvin).

Fiskuð víti: 1 (Atli).

Utan vallar: 8 mínútur.