Hrafn: Maður verður að vera ánægður körfuboltans vegna

Hrafn Kristjánsson, þjálfari KR, var skiljanlega svekktur í leikslok eftir eins stigs tap í framlengdum leik á móti Keflavík í Toyota-höllinni í Keflavík í kvöld. KR hefur þar með tapað tveimur leikjum í röð í undanúrslitaeinvígi liðanna og framundan er hreinn úrslitaleikur um sæti í úrslitaeinvíginu.

„Þetta var ótrúlegur leikur en við erum aftur okkar versti óvinur. Þegar þeir koma til baka á móti okkur þá erum við ekki nógu duglegir að sækja á körfuna. Við verðum passívir, erum bara að senda boltann fyrir utan línuna og erum að gefa þeim löng fráköst sem skilar þeim auðveldum körfum," sagði Hrafn.

„Kannski fórum við í þann gír að verja eitthvað þegar við vorum komnir með eitthvað forskot en við vorum ekki nógu áqrásargjarnir. Það kemur á óvart því það eru ekki enjan með þetta lið," sagði Hrafn.

„Nú bíður okkar fimmti leikur og maður verður að vera ánægður körfuboltans vegna að það skuli vera svona frábærir leikir að detta inn í sjónvarpið," sagði Hrafn.

„Orkan hjá mér er fín en hún er bara pirruð. Nú fer maður heim, horfir á þetta og pirrar sig örugglega ennþá meira. Ég reyni að fá það staðfest sem mér grunar eftir á að það var þetta sem var að," sagði Hrafn.

„Það var öllum ljóst eftir fyrstu tvo leikina að það var ekki fyrir þá að dekka okkur maður á mann. Þeir fara í þetta svæði og mér finnst við ekki vera að leysa það alveg nógu vel. Á köflum erum við að gera það vel þegar við erum að fá gott jafnvægi í sóknarleikinn en þessir þriggja til fjögurra mínútna kaflar þegar við erum of passívir eru rosalega dýrir," sagði Hrafn að lokum.