Jón Halldór: Þetta er ekki búið og við þurfum að halda haus

„Að koma í þetta feikisterka hús og vinna þetta frábæra lið er góð tilfinning," sagði Jón Halldór Eðvaldsson, þjálfari Keflavíkur, eftir sigurinn í kvöld. Keflavík vann frábæran sigur á grönnum sínum í Njarðvík, 67-64, í öðrum leik liðanna um Íslandsmeistaratitilinn og leiða því einvígið 2-0.



„Við komum inn í annan leikhlutann eins og brjálæðingar en það lagði grunninn af þessum sigri".



„Það er þægilegt fyrir alla að vera 2-0 yfir en þetta er langt frá því að vera búið og við verðum að skrúfa hausinn heldur betur fast á okkur fyrir næsta leik," sagði Jón.



„Njarðvík er með hörkulið eins og allir sáu hér í kvöld og við þurfum bara að spýta í. Þetta eru reynslumiklar stelpur og þær vita að við verðum að koma okkur niður á jörðina til að klára dæmið,"sagði Jón, en með sigri getur Keflavík orðið Íslandsmeistari á föstudaginn.