Pálína: Tilfinningin er alltaf jafngóð

Pálína Gunnlaugsdóttir fór fyrir liði Keflavíkur þegar þær tryggðu sér Íslandsmeistaratitilinn með 61-51 sigri í þriðja leiknum á móti Njarðvík í úrslitaeinvíginu í Iceland Express deild kvenna.

"Tilfinningin er alltaf jafngóð," sagði Pálína Gunnlaugsdóttir eftir að Íslandsmeistaratitilinn var í höfn. "Þetta var besti leikurinn okkar í úrslitaeinvíginu og í kvöld náðum við loksins að sýna okkur besta andlit. Flestum stelpunum í okkar liði dauðlangaði í sumarfrí í kvöld," sagði Pálína.

"Njarðvík er með hörkulið og þær hefðu alveg eins getað unnið okkur. Við vorum heppnar í fyrsta leiknum, áttum svo fínan annan leikhluta í leik númer tvö og svo vorum við bara með þetta í kvöld. Þetta leit út fyrir að vera burst í byrjun en við vissum samt allveg að NJarðvík myndi koma til baka," sagði Pálína sem átti frábæran leik og endaði með 17 stig og 7 fráköst.

"Ég var ákveðin í kvöld því mig langaði í sumarfrí. Ef við hefðum tapað í kvöld þá hefði ég þurft að fara á æfingu í fyrramálið," sagði Pálína sem var að verða Íslandsmeistari í fjórða sinn á síðustu sex árum. "Þetta er bara æðislegt og tilfinning sem er ekki hægt að lýsa," sagði Pálína en það má sjá allt viðtalið með því að smella hér fyrir ofan.