Njarðvíkurkonur tryggðu sér oddaleik á móti deildarmeisturunum

Kvennalið Njarðvíkur heldur sigurgöngu sinni áfram í Ljónagryfjunni í dag en liðið tryggði sér oddaleik um sæti í lokaúrslitum með níu stiga sigri á Hamar, 79-70. í úrslitakeppni Iceland Express deild kvenna.

Þetta var sjötti heimasigur Njarðvíkurliðsins í röð en framundan er oddaleikur hjá liðunum í Hveragerði á þriðjudaginn kemur þar sem að bæði liðin hafa unnið tvo leiki.

Shayla Fields (30 stig), Julia Demirer (27 stig og 15 fráköst) og Dita Liepkalne (16 stig, 8 fráköst og 8 stoðsendingar) áttu allar frábæran dag með Njarðvík og voru saman með 73 stig, 30 fráköst og 11 stoðsendingar. Þær skoruðu saman meira en allt Hamarsliðið en Ólöf Helga Pálsdóttir skoraði 6 stig og var eini íslenski leikmaður Njarðvíkur sem komst á blað.

Jaleesa Butler var í sérflokki hjá Hamar með 36 stig og 12 fráköst, Slavica Dimovska var með 13 stig og 8 stoðsendingar og Fanney Lind Guðmundsdóttir skoraði 11 stig. Landsliðskonan Kristrún Sigurjónsdóttir skoraði hinsvegar bara eitt stig í leiknum og munaði um minna fyrir Hamar.

Njarðvík byrjaði leikinn af krafti, komst í 6-0, 8-3 og 17-7 en það munaði síðan sjö stigum á liðunum eftir fyrsta leikhlutan þegar staðan var 22-15 fyrir Njarðvík.

Njarðvík komst í 24-15 í upphafi annars leikhluta en þá skoraði Hamarsliðið tíu stig í röð og komst yfir í 25-24. Njarðvíkurliðið gaf þá aftur í og var með níu stiga forystu í hálfleik, 42-33.

Shayla Fields, Julia Demirer og Dita Liepkalne voru komnar saman með 40 stig og 17 fráköst í hálfleik en þar af skoraði Fields 17 stig.

Hamar með Jaleesu Butler í fararbroddi náði að minnka muninn niður í fimm stig, 59-54, fyrir lok þriðja leikhluta en Butler skoraði 16 stig í leikhlutanum.

Hamar jafnaði metin í 65-65 þegar þrjár mínútur voru eftir en Njarðvíkurliðið náði aftur sex stiga forskoti, 71-65, þegar 75 sekúndur voru eftir og landaði síðan góðum sigri.



Njarðvík -Hamar 79-70 (22-15, 20-18, 17-21, 20-16)Njarðvík: Shayla Fields 30/7 fráköst, Julia Demirer 27/15 fráköst, Dita Liepkalne 16/8 fráköst/8 stoðsendingar, Ólöf Helga Pálsdóttir 6/4 fráköst.

Hamar: Jaleesa  Butler 36/12 fráköst, Slavica Dimovska 13/8 stoðsendingar, Fanney Lind Guðmundsdóttir 11, Þórunn Bjarnadóttir 4/4 fráköst, Íris Ásgeirsdóttir 3/4 fráköst, Jenný Harðardóttir 2, Kristrún Sigurjónsdóttir 1.