Umfjöllun: Naumur sigur Grindavíkur

Grindavík er komið í 1-0 forystu í einvíginu gegn Stjörnunni í fyrstu umferð úrslitakeppni Iceland Express-deild karla. Grindvíkingar unnu nauman sigur á heimavelli, 90-83, eftir hörkuspennandi viðureign.

Grindvíkingar voru með undirtökin lengst af í leiknum en Stjörnumenn gáfust aldrei upp og náðu forystunni nokkrum sinnum í seinni hálfleik.

Lokamínúturnar voru æsispennandi en Grindvíkingum tókst með naumindum að verja forystu sína og klára leikinn með sigri sem fyrr segir.

Grindvíkingar tóku frumkvæðið í leiknum strax í upphafi og þeir gulklæddu voru duglegir að skjóta að utan. Alls skoruðu þeir sex þriggja stiga körfur, þar af Mladen Soskic þrjár, og tóku átta stiga forystu eftir fyrsta leikhluta, 28-20.

Nick Bradford er greinilega að koma sér betur inn í takt Grindavíkurliðsins því hann var duglegur að spila félaga sína uppi í upphafi leiks. Það átti reyndar eftir að draga af honum í öðrum leikhluta.

Stjörnumenn náðu að laga varnarleikinn aðeins í öðrum leikhluta en fyrir vikið var baráttan í teignum þeim mun meiri. Ryan Pettinella var þar sterkur en alls skoraði hann þrettán stig í fyrri hálfleik. Soskic var reyndar stigahæstur með sautján hjá Grindavík en heimamenn náðu ekki að fylgja eftir öflugri byrjun og misnotuðu öll þriggja stiga skotin sín í öðrum leikhluta.

Stjarnan er mikið baráttulið og þó svo að Grindavík hafi verið sterkari aðilinn í fyrri hálfleik gáfust Garðbæingar aldrei upp. Eistlendingurinn Renato Lindmets fór þar fremstur í flokki en hann skoraði alls fjórtán stig í fyrri hálfleik og var áberandi í leik liðsins.

Gestirnir byrjuðu síðari hálfleikinn af miklum krafti og voru ekki nema örfáar mínútur að ná forystunni í fyrsta sinn í leiknum, 52-51. Þá vaknaði skyndilega Páll Axel Vilbergsson til lífsins og skoraði næstu níu stig Grindavíkur í leiknum - allt utan þriggja stiga línunnar.

Grindavík var því enn með frumkvæðið þegar að fjórði leikhlutinn hófst en Stjörnumenn héldu áfram að salla inn stigunum og halda leiknum galopnum. Jovan Zdravevski setti niður mikilvægan þrist og kom Stjörnunni yfir þegar tæpar átta mínútur voru til leiksloka.

Við tók lokakafli þar sem barist var af hörku í hverri einustu sókn. Grindvíkingar reyndust hafa betur í þeirri baráttu og var það viðeigandi að vinnuþjarkurinn Ólafur Ólafsson hafi stolið boltanum þegar tæpar tíu sekúndur voru eftir og kláraði leikinn með glæsilegri troðslu. Ólafur var einn allra besti leikmaður Grindavíkur í kvöld og kórónaði þarna góðan leik.

Mikið hefur verið fjallað um innkomu Nicks Bradfords í Grindavíkurliðið en hann átti lengst af fínan leik í kvöld. Hann þreyttist þó fljótt og því þurfti hann að hvíla nokkuð oft en staðreyndin var einfaldlega sú að Grindavík gekk betur með hann inn á vellinum.

Hinn nautsterki Ryan Pettinella naut sín einnig í teignum og fékk ef til vill full mikið frelsi frá varnarmönnum Stjörnunnar til þess. Þegar að Grindavík þurfti að leita inn í teig leysti hann oftast vel úr þeirri stöðu. Mladen Soskic byrjaði frábærlega í kvöld og átti ágætan leik eins og fleiri í liði Grindavíkur.

Liðsheildin var sem fyrr kannski sterkasti þátturinn við leik Stjörnunnar en það munar einnig mikið um Lindmets sem hefur verið öflugur í bláa búningnum. Lykilmenn eins og Justin Shouse, Fannar Freyr Helgason, Jovan Zdravevski og Marvin Valdimarsson skiluðu einnig sínu.

Liðin mætast næst í Garðabænum á sunnudagskvöldið.

Grindavík-Stjarnan 90-83 (28-20, 17-18, 22-26, 23-19)Grindavík: Mladen Soskic 20/4 fráköst, Ryan Pettinella 19/8 fráköst, Páll Axel Vilbergsson 18/6 fráköst, Ólafur Ólafsson 17/5 fráköst/7 stoðsendingar, Nick Bradford 12/10 fráköst/7 stoðsendingar, Ómar Örn Sævarsson 4, Björn Steinar Brynjólfsson 0, Egill Birgisson 0, Helgi Björn Einarsson 0, Þorsteinn Finnbogason 0, Ármann Vilbergsson 0.

Stjarnan: Justin Shouse 21/9 stoðsendingar, Jovan Zdravevski 17, Renato Lindmets 16/4 fráköst, Marvin Valdimarsson 14, Fannar Freyr Helgason 10/15 fráköst, Daníel G. Guðmundsson 3, Guðjón Lárusson 1, Kjartan Atli Kjartansson 1, Tómas Þórður Hilmarsson 0, Sigurbjörn Ottó Björnsson 0, Dagur Kár Jónsson 0, Ólafur Aron Ingvason 0.