Ákvörðun um áfrýjun tekin á næstu dögum

Ákæruvaldið í máli Gunnars Rúnars Sigþórssonar hefur ekki tekið ákvörðun um hvort málinu verði áfrýjað til Hæstaréttar en héraðsdómur úrskurðaði Gunnar Rúnar, sem myrti Hannes Þór Helgason á síðasta ári, ósakhæfan.

Í samtali við fréttastofu í morgun sagði Sigríður Elsa Kjartansdóttir sem sótti málið fyrir hönd ákæruvaldsins að engin ákvörðun hefði verið tekin um áfrýjun. Það verði skoðað á næstu dögum.

Jafnframt sagði hún að í raun kæmi lítið á óvart í niðurstöðunni því erfitt hefði verið fyrir dóminn að ganga gegn niðrustöðum geðlæknanna þriggja. Hún sagðist þó telja ýmis rök hafa verið til stuðnings þess að Gunnar Rúnar yrði sakfelldur og dómurinn hefði mátt fjalla betur um þau rök í niðurstöðu sinni.