Leikmaður Grindavíkur þurfti að klæðast KR-treyjunni í vinnunni

Grindvíkingurinn Björn Steinar Brynjólfsson hefur ekki átt auðveldan dag í vinnunni. Hann vinnur hjá DHL og hefur mátt gera sér það að góðu að vera í KR-treyjunni í vinnunni í dag.

Eins og kunnugt er þá töpuðu Grindvíkingar fyrir KR í bikarúrslitum um helgina.

Björn Steinar fór í veðmál við framkvæmdastjóra DHL, Atla Frey Einarsson, sem er mikill KR-ingur, fyrir leikinn. Atli hefði mætt í Grindavíkurtreyju ef Grindavík hefði unnið og öfugt.

Atli er því í huggulegri skyrtu í vinnunni en Björn í KR-búningnum sem Atla finnst reyndar vera afar huggulegur.