Línurnar að skýrast fyrir Contraband Baltasars

Kvikmyndabiblían Variety greindi frá því í gær að leikararnir Giovanni Ribisi og Ben Foster væru í viðræðum við Universal um að leika í Contraband, Hollywood-kvikmynd Baltasars Kormáks.

Kvikmyndavefmiðlar á borð við Empireonline og Collider.com fjölluðu ítarlega um frétt Variety þess efnis að Giovanni Ribisi og Ben Foster væru í viðræðum við Universal um að leika í endurgerð Reykjavík-Rotterdam sem Baltasar Kormákur leikstýrir. Tökur eiga að hefjast í janúar en eins og flestum ætti að vera kunnugt leika þau Mark Wahlberg og Kate Beckinsale aðalhlutverkin.

Baltasar hefur verið að safna liði, ráða til sín búningahönnuð og kvikmyndatökumenn enda er Hollywood-batteríið margfalt stærra en á Íslandi.

Giovanni Ribisi er mörgum að góðu kunnur þótt ekki sé víst að nafnið hringi mörgum bjöllum. Flestir muna eflaust eftir honum sem Frank Buffay, bróður Phoebe í Friends-þáttunum, en Ribisi hefur einnig leikið í stórmyndum á borð við Avatar og Public Enemy. Ben Foster er hins vegar spáð miklum frama í Hollywood á næstu árum en hann lék meðal annars í The Messenger sem tilnefnd var til tvennra Óskarsverðlauna.

Ekki er vitað í hvaða hlutverki Ribisi verður en miðað við þau hlutverk sem eftir eru í íslensku myndinni er líklegt að það sé hlutverk Ingvars E. Sigurðssonar. Ingvar lék í myndinni Steingrím, sem fær aðalpersónuna Kristófer til að smygla í síðasta sinn. Ben Foster á hins vegar að leika mág Kristófers en það hlutverk var í höndum Jörundar Ragnarssonar í kvikmynd Óskars Jónassonar.

Mark Wahlberg leikur síðan auðvitað hlutverkið sem Baltasar Kormákur fór með og Kate Beckinsale verður hin ameríska Íris en það hlutverk var í höndum Lilju Nætur Þórarinsdóttur.

freyrgigja@frettabladid.is