Slavica tryggði Hamar sigur á Íslandsmeisturunum

Hamar vann þriggja stiga sigur á KR, 79-76, í æsispennandi og dramatískum leik í Hveragerði í Iceland Express deild kvenna í dag. Snæfell vann sinn fyrsta sigur á tímabilinu þegar liðið vann 66-50 sigur á botnliði Fjölnis.

Hamarskonur hafa þar með unnið fimm fyrstu leiki sína á tímabilinu og eru komnar í efsta sætið en Keflavík getur komist upp að hlið þeim með sigri á Haukum annað kvöld.

Hamar byrjaði vel og var 27-18 yfir eftir fyrsta leikhlutann en KR-liðið náði að minnka muninn niður í sex stig, 42-36, fyrir hálfeik. Hamar jók aftur muninn í þriðja leikhlutanum og var tólf stigum yfir, 62-50, fyrir lokaleikhlutann.

KR skoraði 8 af 10 fyrstu stigum fjórða leikhlutans og náði síðan að jafna leikinn í 72-72 þegar ein og hálf mínúta var eftir. Margrét Kara Sturludóttir kom KR síðan í 75-72 þegar 66 sekúndur voru eftir.

Hamar svaraði með því að setja niður eitt víti og vinna síðan boltann aftur þar sem Fanney Lind Guðmundsdóttir kom liðinu í 76-75 með þriggja stiga körfu þegar tólf sekúndur voru eftir. Kara náði að jafna leikinn með því að setja niður annað af tveimur vítum en Hamar fékk síðustu sóknina.

Slavica Dimovska skoraði síðan sigurkörfuna rétt áður en leiktíminn rann út og tryggði sínu liði dramatískan sigur.

Kara fór á kostum í KR-liðinu í fjórða leikhlutanum þar sem hún var með 11 stig og 4 stoðsendingar og sá öðrum fremur til þess að KR vann leikhlutann með 9 stigum, 26-17. Þessi góði endasprettur dugði þó ekki til

Jaleesa Butler var gríðarlega öflug að venju í liði Hamars en hún var með 28 stig, 20 fráköst og 5stoðsendingar í leiknum.

Kristrún Sigurjónsdóttir skoraði 19 stig og Slavica Dimovska var með 17 stig og 6 stosðendingar.

Margrét Kara Sturludóttir og Hildur Sigurðardóttir voru í aðalhlutverki hjá KR. Kara var með 28 stig, 8 fráköst og 6 stoðsendingar en Hildur skoraði 24 stig.

Sade Logan skoraði 20 stig fyrir Snæfell í sextán stiga sigri á Fjölni, 66-50, en fyrir leikinn höfðu bæði liðin tapað öllum leikjum sínum.

Snæfell komst í 22-11 eftir fyrsta leikhlutann og var tíu stigum yfir í hálfleik, 36-26. Sigur liðsina var aldrei í mikilli hættu í seinni hálfleik.

Björg Guðrún Einarsdóttir skoraði 12 stig fyrir Snæfell og Helga Hjördís Björgvinsdóttir var með 11 stig og 8 fráköst. Bergþóra Holton Tómasdóttir skoraði 15 stig fyrir Fjölni og Inga Buzoka var með 10 stig og 13 fráköst.