Flóðið í kvöld stærra en í gær - rýming vel á veg komin

Flóðið sem er á leiðinni niður Eyjafjallajökul sem er að koma niður Gígjökul vegna gossins í Eyjafjallaökli er stærra en flóðið í gær að sögn Rögnvalds Ólafssonar hjá Almannavörnum. Rætt var við Rögnvald á Bylgjunni í kvöld.

Hann segir að í flóðinu séu miklir ísjakar en það hefur hann eftir vísindamönnum sem eru í flugvél landhelgisgæslunnar núna að kanna aðstæður.

Vart varð við hlaupið um hálf sjö í kvöld. Fjölmiðlum bárust svo tilkynning um tafarlausa rýmingu rétt fyrir klukkan sjö.

Flóðið nú virðist vera meira um sig heldur en flóðið í gær. Aftur á móti virðist það vera að sjatna eftir því sem flæðir lengra niður jökulinn.

Þá sagði Rögnvaldur að flóðið nú væri þegar búið að valda meira tjóni en flóðið í gær.

Rýming er vel á veg komin.