Litli vinurinn skaddaður

Kvikmyndin Jackass 3D var frumsýnd um helgina í Bandaríkjunum og fór beint á toppinn. Að því tilefni hefur Johnny Knoxville, forsprakki hópsins, upplýst að litli vinurinn hans í suðri hafi komið illa út úr hamaganginum við framleiðslu Jackass-myndanna.

„Hann lítur út eins og tuggið hundaleikfang," sagði Knoxville um fjölskyldudjásnið. „Vinurinn brotnaði fyrir þremur árum þegar ég var að reyna stökk aftur á bak á mótorhjóli. Það hjálpaði ekki til við að láta hann líta vel út - en hann er samt frekar sætur. Ég þarf ennþá að nota hjálpartæki til að pissa og það eru liðin þrjú ár."

Bam Margera, Íslandsvinur og félagi Knoxville í Jackass-genginu, segir aðeins einn mann koma vel út úr myndinni og hann heitir Chris Pontius.

„Hann var í atriði sem heitir „Þyrluspaðinn" þar sem hann batt band utan um vininn og í fjarstýrða þyrlu. Bandið rifnaði svo harkalega af að vinurinn stækkaði um þrjá sentimetra!"