Leitin hafin á ný

Elite-módelskrifstofan á Íslandi hefur leit að næstu Elite-stúlku landsins á ný og mun starfsfólk á vegum skrifstofunnar taka á móti umsóknum í Kringlunni í dag.

„Við ákváðum að hafa góðan fyrirvara í þetta sinn. Síðast vorum við nýbúnar að opna skrifstofuna og höfðum aðeins fimm vikur til að skipuleggja alla keppnina,“ útskýrir Tinna Aðalbjörnsdóttir hjá Elite. Hún segist fyrst og fremst vera að leita að næstu Elite-stúlku landsins en einnig að strákum og stúlkum til að hafa á skrá hjá fyrirtækinu.

„Leitin hefst í dag en heldur svo eitthvað áfram. Einnig verður hægt að skrá sig í keppnina á netinu og niðri á skrifstofu hjá okkur. Um áramótin hefst svo undirbúningur með Elite-stúlkunum, sem stendur allt þar til í mars þegar íslenska keppnin fer fram,“ segir Tinna.

Tinna og starfsfólk á vegum skrifstofunnar verða fyrir framan verslunina Outfitters Nation á fyrstu hæð Kringlunnar á milli klukkan 14.00 og 18.00 í dag.- sm