Þrefaldur sigur hjá Glee-stjörnu

Lea Michele hefur slegið í gegn í sjónvarpsþáttunum Glee sem njóta fáránlegra vinsælda um hinn vestræna heim.

Enn ein rósin verður sett í hnappagat Michele í kvöld þegar hún verður heiðruð á sérstöku kvennakvöldi Billboard-listans fyrir framúrskarandi frammistöðu á dans-, söng- og leiklistarsviðinu en Michele fer á kostum á öllum þessum sviðum í hverri einustu viku að mati samtakanna sem standa að þessu kvöldi.

Michele, sem leikur Rachel Berry í þáttunum, segir í viðtali við Billboard-tímaritið að þau kalli Matthew Morrison þrefalda ógnun. „Hann getur nefnilega gert allt, leikið, dansað og sungið.

Ég er ákaflega spennt því nú fæ ég þetta uppnefni lánað. Sem er virkilega spennandi," segir Lea en meðal stórstjarna sem hafa komið fram í þættinum má nefna Britney Spears.

„Við leggjum hart að okkur í Glee. Þegar við erum ekki að taka upp þátt erum við í upptökuveri eða á dansæfingum. Það er mikil vinna sem fer í að koma þessum þætti saman og að fá þessi verðlaun er frábært fyrir mig og mikill heiður."