Þorleifur: Vinnum ef við spilum okkar besta leik

Grindvíkingurinn Þorleifur Ólafsson segir að spenningurinn sé mikill fyrir bikarúrslitaleikinn gegn Snæfelli í dag.

„Það má heldur betur búast við jafnri viðureign. Snæfellingar hafa spilað mjög vel uppá síðkastið og verið að bæta við sig mannskap. Þetta er ekki óskamótherji okkar en við verðum bara að taka því," segir Þorleifur.

Hann segir undirbúning Grindavíkur að mestu hefðbundinn fyrir þennan leik. „Við höfum samt skoðað Snæfellsliðið betur en ef um hefðbundinn deildarleik væri að ræða. Það er mikilvægt að við mætum tilbúnir og spilum okkar leik," segir Þorleifur sem lofar góðri mætingu úr Grindavík.

„Ég tel að ef við spilum okkar besta leik þá munum við vinna. Þá eru þeir ekki að fara að klára okkur."