Vettel: Nýju dekkin betri en flestir áttu von á

Sebastian Vettel, nýbakaður Formúlu 1 meistari prófaði nýju Pirelli dekkin sem verða notuð á næsta ári í dag og í gær ásamt fjölda ökumanna keppnisliða. Prófunin er mikilvægur þáttur í þróun dekkjanna fyrir komandi keppnistímabil þar sem Pirelli tekur við því hlutverki að útvega dekk í stað Bridegstone sem hefur gert það síðustu ár. Þáttur Pirelli er mikilvægur, þar sem dekkin skipta sköpum og 24 ökumenn munu þrautreyna þau í mótum á næsta ári, en 20 mót verða á dagskrá 2011. Keppnislið munu reyna 2011 bíla sína í febrúar, ef allt gengur samkvæmt áætlun með smíði þeirra hjá öllum liðum. "Í heildina held ég að það sé mikið verk fyrir höndum, en ég held þetta sé betra en flestir áttu vona á. Í heildina litið voru þetta tveir góðir dagar. Ég myndi gjarnan vilja keyra meira, en rétt eins og í gær þá sprakk hjá mér í dag, sem kostaði tíma. Núna þarf að skoða og greina hlutina fyrir næsta ár", sagði Vettel í frétt á autosport.com. Dekk sprakk hjá Vettel í gær og hafði það skorist vegna aðskotahluts í brautinni, en Paul Hembery yfirmaður Pirelli, en vildi ekkert ræða sérstaklega um hvað gerðist í dag og málið er í skoðun og hann kvað það ekkert áfall að þetta kæmi upp á æfingu. Í annarri frétt fyrr um daginn á autosport.com sagði að fyrstu athuganir bentu til þess sama og gerðist í gær. "Það hefur ekkert sjokkerað eða verið slæmt og niðurstaða æfinganna er hvatning og við erum á réttri leið", sagði Pembery um útkomuna á æfingunum. "Eftir þessa æfingar og vinnu í Barein í næsta mánuði þá verðum við með góða hugmynd um hvaða afbrigði af dekkjum á að mæta með á einstakar brautir.", sagði Hembery.