Hlutabréf Eimskips rjúka upp um 25 prósent

Gengi hlutabréfa í Eimskipafélaginu hækkaði um 25 prósent í einum viðskiptum upp á 32 þúsund krónur við upphaf viðskipta í Kauphöllinni í dag. Þetta er mesta hækkun dagsins. Á sama tíma hefur gengi bréfa í Marel Food Systems hækkað um 1,29 prósent og Færeyjabanka um 0,4 prósent.

Engin hlutabréf hafa lækkað í verði á sama tíma.

Einungis átta viðskipti hafa átt sér stað á markaðnum það sem af er dags upp á 26,2 milljónir króna. Mest eru viðskipti með bréf Marel Food Systems, eða upp á 25,7 milljónir.

Gamla Úrvalsvísitalan hefur hækkað um 0,35 prósent og stendur hún í 220 stigum.