Fannar: Við erum erfiðir þegar við spilum svona vörn

Miðherjinn Fannar Ólafsson skoraði 9 stig og hirti 11 fráköst á gamla heimavellinum sínum í Keflavík í kvöld þegar lið hans KR vann 88-75 sigur og komst með annan fótinn í úrslitaeinvígið í Iceland Express deildinni.

Fannar sagði vörnina hafa verið lykilinn að góðum sigri KR í kvöld, en hún hefur verið aðalsmerki vesturbæjarliðsins í allan vetur.

"Liðið var bara að spila frábæra vörn. Við fengum talsvert mikið af auðveldum stigum og svo þegar við erum með skorara eins og Jón Arnór er erfitt að eiga við okkur," sagði Fannar í samtali við Vísi. Jón Arnór skoraði 35 stig í leiknum.