Birkir og Höskuldur takast á um sæti Valgerðar

Birkir Jón Jónsson varaformaður Framsóknarflokksins og Höskuldur Þórhallsson þingmaður vilja báðir leiða framboðslista flokksins í Norðausturkjördæmi. Undanfarin ár hefur Valgerður Sverrisdóttir verið oddviti flokksins í kjördæminu en hún tilkynnti nýverið að hún sækist ekki eftir endurkjöri.

Birkir Jón var fyrst kjörinn á þing vorið 2003 og hann tók við sem varaformaður á landsþingi flokksins í janúar síðastliðnum. Höskuldur tók sæti á Alþingi eftir kosningarnar 2007. Hann sóttist eftir formennsku í flokknum en tapaði naumlega fyrir Sigmundi Davíð Gunnlaugssyni á landsþinginu í seinasta mánuði.

Sextán frambjóðendur hafa gefið kost á sér til framboðs í kjör um átta efstu sæti framboðslista Framsóknarflokksins í kjördæminu vegna alþingiskosninganna í vor. Frestur til að skila inn framboðum rann út á föstudaginn.

Kosið verður um 1. til 8. sæti á framboðslista framsóknarmanna á kjördæmisþingi sem haldið verður 15. mars 2009. Atkvæðisrétt á því þingi munu allir flokksbundnir framsóknarmenn í Norðausturkjördæmi hafa í stað þess að valdir séu fulltrúar miðað við tiltekinn félagsmannafjölda hvers aðildarfélags, líkt og gerist á reglulegum kjördæmisþingum.

Frambjóðendurnir skiptast í 6 konur og 10 karla, yngsti frambjóðandinn er 19 ára en sá elsti 63 ára.

Eftirtaldir skipa hópinn:

Anna Kolbrún Árnadóttir, sérkennari, 1.- 8. sæti

Birkir Jón Jónsson, alþingismaður, 1.sæti

Höskuldur Þ Þórhallsson, alþingismaður, 1. sæti

Áskell Einarsson, bóndi, 2.- 8. sæti

Eva Ásrún Albertsdóttir, ljósmóðir og dagskrárgerðarmaður, 2.- 3. sæti

Huld Aðalbjarnardóttir menningar-og fræðslufulltrúi Norðurþings, 2.- 3. sæti

Hólmar Örn Finnsson, viðskiptalögfræðingur, 2.- 4. sæti

Sigfús Karlsson, framkvæmdastjóri, 2.- 4. sæti

Hallveig Björk Höskuldsdóttir, leiðtogi í málmvinnslu Alcoa, 4. sæti

Bernharð Arnarsson, bóndi, 5.- 8. sæti

Gunnar Þór Sigbjörnsson, þjónustustjóri, 5. sæti

Svanhvít Aradóttir, forstöðuþroskaþjálfi, 5. sæti

Þórarinn Ingi Pétursson, bóndi og tamningamaður, 5. sæti

Eiður Ragnarsson, starfsmaður í málmvinnslu Alcoa, 7.- 8. sæti

Hafþór Eide Hafþórsson, nemi, 7.- 8. sæti

Heiða Hilmarsdóttir, skrifstofustjóri hjá Sölku - Fiskmiðlun, 7.- 8. sæti