KR vann botnliðið

KR vann í dag fremur auðveldan sigur á Fjölni, 90-57, eftir að hafa lent undir að loknum fyrsta leikhluta, 23-19.

KR-ingar réttu sinn hlut strax í öðrum leikhluta en staðan í hálfleik var 48-35, KR í vil. Leikið var á heimavelli Fjölnis í dag en gestirnir gerðu svo endanlega út um leikinn í þriðja leikhluta sem KR vann með 22 stigum gegn tíu.

Sigrún Sjöfn Ámundadóttir átti góðan leik og skoraði 22 stig og tók sjö fráköst. Heiðrún Kristmundsdóttir kom næst með fjórtán stig og átta stoðsendingar. María Ben Sturludóttir skoraði þrettán stig og gaf einnig átta stoðsendingar.

Hjá Fjölni var Birna Eiríksdóttir stigahæst með sextán stig en Eva María Emilsdóttir kom næst með fjórtán stig og sex fráköst.

KR er nú með sextán stig í fjórða sæti deildarinnar en Fjölnir er enn á botninum með tvö.