Fjögurra ára dóttir Mike Tyson í lífshættu

Fjögurra ára gömul dóttir Mike Tyson, Exodus, liggur á spítala og er vart hugað líf eftir að að skelfilegt slys átti sér stað á heimili Tysons í Phoenix.

Exodus festi höfuðið í snúru á æfingatæki á heimilinu og sjö ára bróðir hennar fann hana meðvitundarlausa.

Var stúlkan flutt með hraði á spítala þar sem hún liggur nú á gjörgæsludeild. Er ástand hennar sagt vera mjög alvarlegt.

Tyson var sjálfur staddur í Las Vegas þegar atvikið átti sér stað en flýtti sér heim með hraði til þess að vera við hlið dóttur sinnar.

Fjölskyldan gaf frá sér yfirlýsingu í dag þar sem hún þakkaði fyrir bænirnar og stuðninginn sem hún hefði fengið.

Einnig bað hún fjölmiðlafólk um að gefa sér tilfinningalegt svigrúm á erfiðum tímum.