Birna: Þetta er vonandi allt að smella saman hjá okkur

„Þetta er allt vonandi að smella saman hjá okkur," segir Keflvíkingurinn Birna Valgarðsdóttir en hún og félagar hennar hafa unnið tvo síðustu leiki sína í kvennakörfunni eftir fjögur töp í fyrstu fjórum leikjunum. Keflavík heimsækir Hauka í 7. umferð Iceland Express deildar kvenna í kvöld.

„Það er komin meiri leikgleði í þetta hjá okkur og við erum líka komnar með nýjan kana. Hún er að breyta miklu fyrir okkur. Hún er mjög góð og dregur okkur með sér. Þetta er mjög öflugur leikmaður," segir Birna um Kristi Smith sem var með 21 stig í fyrsta leiknum sínum sem Keflavík vann með 27 stigum.

„Við vorum í vandræðum með koma boltanum upp og það var aðalvandamálið hjá okkur og þessi hentar því betur en hin," segir Birna. Birna segir líka að það muni mikið um að fá Bryndísi Guðmundsdóttur til baka en hún er með 12,7 stig, 10.7 fráköst og 4,3 stoðsendingar í fyrstu þremur leikjum sínum. „Hún styrkir okkur þvílíkt mikið," segir Birna.

Haukarnir hafa unnið fyrstu fjóra heimaleiki vetrarins í deildinni og Birna veit að það mun reyna á hennar lið á móti Íslandsmeisturunum í kvöld.

„Ég held að þetta verði mjög skemmtilegur og jafn leikur. Bæði liðin þurfa að hafa fyrir þessu en ég vona að við vinnum. Það væri óskandi að fá þriðja sigurinn í röð núna en við þurfum þá að vera duglegar," segir Birna.

Birna hefur spilað í gegnum meiðsli að undanförnu en segist vera öll að ná sér. „Ég reif vöðva frá rifbeininu og það blæddi inn á milli rifjanna. Það var eins og ég hafði brotnað. Ég er samt öll að koma til og það má koma við þetta núna," segir Birna sem missti ekki af neinum leik þrátt fyrir þessu leiðinlegu meiðsli. "Ég æfði ekki en píndi mig í leikina," segir Birna.

Leikur Hauka og Keflavíkur hefst klukkan 19.15 á Ásvöllum í kvöld og á sama tíma tekur Snæfell á móti Hamar í Stykkishólmi og nágrannarnir Grindavík og Njarðvík mætast í Grindavík.