Jesse Rosa: Trúi þessu varla

„Þetta er alveg ótrúlega svekkjandi og ég trúi þessu varla enn. Þetta var fáranlegt," sagði Bandaríkjamaðurinn í liði Keflavíkur, Jesse Rosa, eftir leikinn en hann var í losti þegar Vísir hitti á hann.

Sat ber að ofan með höfuðið ofan í bringunni. Algjörlega búinn á því á líkama sem og sál. Skal engan undra enda lék hann nánast allan leikinn og skoraði hvorki fleiri né færri en 51 stig.

„Við vorum með þá en gerðum lítil mistök sem urðu okkur dýrkeypt. Ég á líka sök á þessu tapi. Hefði átt að gera aðeins betur sjálfur," sagði Rosa en blaðamaður benti honum góðfúslega á að hann hefði þó skorað 51 stig í leiknum.

„Það var ekki nóg til að vinna þannig að mér er alveg sama," sagði Rosa og viðurkenndi að sér hefði verkjað í allan líkamann síðasta klukkutímann eða svo. Hann fékk tvisvar krampa, harkaði af sér og skoraði ótrúlegar körfur.

Aðspurður sagðist hann vel vera til í að skoða að koma aftur til Keflavíkur og spila.