Haukastúlkur deildarmeistarar

Kvennalið Hauka tryggði sér í kvöld deildarmeistaratitilinn í Iceland Express deildinni með öruggum sigri á Keflavík á Ásvöllum 82-67 og um leið heimavallarréttinn alla úrslitakeppnina.

Haukaliðið hafði yfir í hálfleik 53-30 og eftir það var sigur liðsins aldrei í teljandi hættu. Haukaliðið hefur 32 stig á toppi A-riðils, Keflavík hefur 24 stig í öðru, KR 20 í þriðja og Hamar 18 í fjórða sætinu.

Haukar hafa unnið alla þrjá leiki sína gegn Keflavík í vetur en á meðan Haukar þurftu góða endaspretti til að tryggja sér sigur í fyrstu tveimur leikjunum, var sigur liðsins öruggur í kvöld.

Slavica Dimovska átti stórleik í liði Hauka í kvöld og skoraði 31 stig, hirti 9 fráköst og gaf 8 stoðsendingar. Guðbjörg Sverrisdóttir skoraði 14 stig, Kristrún Sigurjónsdóttir 12 og Ragna Brynjarsdóttir 11 stig og 10 fráköst.

Hjá Keflavík var Pálína Gunnlaugsdóttir með 15 stig og 12 fráköst og Bryndís Guðmundsdóttir 13 stig og hirti 11 fráköst. .