Friðrik: Sanngjörn úrslit

Friðrik Ragnarsson, þjálfari Grindavíkur, sagði að sigur Stjörnunnar á sínum mönnum í kvöld hafi verið sanngjarn.

„Stjörnumenn spiluðu mjög vel og við vorum að sama skapi seinir í gang," sagði Friðrik í samtali við Vísi eftir leik. „Við reyndum að klóra í bakkann undir lok leiksins og vorum nálægt því að komast inn í þetta."

„Við vorum langt frá okkar besta í kvöld án þess að ég taki nokkuð af Stjörnumönnum. Þeir hafa verið að spila langt undir getu í vetur og í kvöld sýndu þeir sitt rétta andlit."

„Það dugar ekki að spila á 80 prósent krafi gegn liði eins og Stjörnunni. Við verðum að gefa allt okkar til að vinna svona leiki."