Skallagrímur að missa þjálfarann

Hafsteinn Þórisson, formaður körfuknattleiksdeildar Skallagríms, segir að mestar líkur séu á því að erlendir leikmenn félagsins verði sendir heim.

Snæfell, ÍR og Breiðablik hafa ákveðið að láta sína erlendu leikmenn fara vegna efnahagsástandsins í landinu og slæmri stöðu krónunnar. Líklegt er að Ken Webb, þjálfari Skallagríms, fari sömu leið.

Þar að auki er Skallgrímur með Bandaríkjamanninn Eric Bell á sínum snærum sem og Djordo Djordic frá Serbíu.

„Það verður ekkert ákveðið fyrr en að stjórnin fundar sem verður í kvöld en mér sýnist á öllu að það séu mestar líkur á því að þeir verða sendir heim, því miður," sagði Hafsteinn.

Hann sagði að launakostnaður þessara manna hafa rokið upp úr öllu valdi í kjölfar hruns íslensku krónunnar.

„Ef ég ber saman launaseðil frá september í fyrra við þann síðasta hefur hann hækkað um 105 prósent," sagði Hafsteinn.