Hamar skellti KR

Önnur umferðin í Iceland Express deild kvenna í körfubolta hófst í dag með þremur leikjum. Hamar skellti KR í DHL höllinni 76-65 og hefur unnið báða leiki sína til þessa.

Lakiste Barkus var atkvæðamest í liði Hamars með 22 stig, 10 fráköst, 5 stoðsendingar og 4 varin skot. Julia Demirer skoraði 20 stig, hirti 6 fráköst og varði 5 skot. Fanney Guðmundsdóttir og Dúfa Ásbjörnsdóttir skoruðu 10 stig hvor.

Hjá KR var Hildur Sigurðardóttir atkvæðamest með 24 stig og 13 fráköst og Sigrún Ámundadóttir skoraði 10 stig og hirti 9 fráköst.

Keflavík burstaði Snæfell á útivelli 90-57 og Grindavík lagði Fjölni á útivelli 92-60.

Hamar er á toppi deildarinnar með fullt hús stiga eftir tvær umferðir, en þangað kemst einnig sigurvegarinn í leik Hauka og Vals á morgun.