"Það hefði hvaða lið sem er unnið okkur með fjörutíu stigum í dag," sagði Valur Ingimundarson í samtali við Vísi eftir að hans menn í Njarðvík voru teknir í kennslustund af frískum KR-ingum í vesturbænum 103-48.
"Við bara gátum ekkert í dag. Sóknarleikur okkar er á fárra höndum og þegar Logi og Maggi ná sér ekki á strik, þá er lítið eftir hjá okkur. Þeir Maggi, Logi og Friðrik hafa staðið sig alveg frábærlega í vetur, en þetta er búið að hvíla mikið á þeirra herðum," sagði Valur og benti á hvað liðið hefði misst marga leikmenn fyrir tímabilið.
"Við misstum átta leikmenn og erum með mikið af mönnum úr fyrstu deild. Svo vantaði okkur alla guttana í dag. Þeir eru búnir að vera að spila mikið og þurftu hvíld í dag," sagði Valur.
"Þetta er ekkert flókið. Þetta er bara staðan á Njarðvík í dag og það hefði hvaða lið sem er geta unnið okkur með fjörutíu stigum í dag," sagði þjálfarinn.
