Hamar hefur aldrei unnið Hauka

Það verður barist um toppsætið í Iceland Express deild kvenna þegar spútniklið Hamars sækir heitasta lið deildarinnar heim á Ásvelli klukkan 19.15 í kvöld. Bæði lið hafa unnið 5 af 6 leikjum sínum en á sama tíma og Hamar tapaði sínum fyrsta leik í síðasta leik þá vann Haukaliðið sinn fjórða leik í röð.

Hamar þarf að endurskrifa sögu félagsins ætli liðið að vera áfram í toppsætinu eftir leikinn í kvöld því kvennalið Hamars hefur aldrei unnið Hauka í meistaraflokki kvenna. Liðin eru hafa mæst átta sinnum í efstu deild síðustu tvö tímabil og hafa Haukarnir unnið alla leikina. Liðin mættust auk þess sex sinnum í 2. deild kvenna frá 2000 til 2003 og Haukarnir unnu alla þá leiki líka. Hamar hefur því tapað 14 deildarleikjum í röð á móti Haukum.

Það hafa fimm leikmenn komið við sögu í öllum átta leikjunum milli Hauka og Hamars í efstu deild kvenna. Það eru annarsvegar Haukakonurnar Kristrún Sigurjónsdóttir og Bára Fanney Hálfdanardóttir og hinsvegar Hamarskonurnar Hafrún Hálfdánardóttir, Jóhanna Björk Sveinsdóttir og Álfhildur Þorsteinsdóttir. Hafrún hefur alls leikið mest allra í þessum átta leikjum eða í samtal 241 mínútu (30,1 í leik) en Kristrún hefur skorað flest stig eða 135 sem gera 16,9 stig að meðaltali í leik.

Haukar unnu leikina fjóra tímabilið 2006-07 með 55,3 stigum að meðaltali en munurinn var kominn niður í 8,0 stig að meðaltali síðasta vetur. Hamarsliðið hefur aldrei byrjað betur en á þessu tímabili og það verður því fróðlegt að sjá hvar liðið stendur á móti Haukum sem eru eina félagið sem kvennalið Hamars hefur ekki náð að vinna í efstu deild.

Hamar gæti reyndar fallið alla leið niður í 3. sætið í kvöld tapi liðið á Ásvöllum og Keflavíkur vinnur sinn leik á heimavelli gegn Val. Haukarnir verða hinsvegar alltaf í hópi tveggja efstu liðanna eftir kvöldið þar sem liðið er með betri innbyrðisstöðu á móti Keflavík.

Leikir Hauka og Hamars í efstu deild kvenna:

29. október 2006 Haukar-Hamar 106-53 (Haukar +53)

10. desember 2006 Hamar-Haukar 22-105 (Haukar +83)

21. janúar 2007 Haukar-Hamar 107-54 (Haukar +53)

28. febrúar 2007 Hamar-Haukar 64-96 (Haukar +32)

17. október 2007 Hamar-Haukar 76-85 (Haukar +9)

21. nóvember 2007 Haukar-Hamar 77-66 (Haukar +11)

9. janúar 2008 Hamar-Haukar 69-73 (Haukar +4)

13. febrúar 2008 Haukar-Hamar 82-74 (Haukar +8)

19. nóvember 2008 Haukar-Hamar ??-??