Kaninn hjá Snæfelli bað um að fá að fara heim

Detra Ashley, bandaríski framherjinn hjá nýliðum Snæfells í Iceland Express deild kvenna, mun leika sinn síðasta leik með liðinu gegn Grindavík í kvöld. Ashley er á leiðinni heima að eigin ósk en það hefur ekki heldur ekki verið alltof mikil ánægja með hana í Hólminum í vetur.

„Við erum að leysa hana undan samningi en við vorum mjög heppin með það að bað um að fá að fara. Við þurftum því ekki að segja henni upp og þurfum því ekki að borga henni áfram laun. Við hefðum annars ekki sagt henni upp," sagði Högni Högnason, þjálfari Snæfells en Detra Ashley er efst í deildinni í fráköstum með 14,8 í leik. Ashley hefur einnig skorað 16,2 stig að meðaltali en er aðeins með 31,3 prósent skotnýtingu sem hefur ekki hjálpað ungu og óhörðnuðu liði Snæfells. Ashley hefur sem dæmi klikkað á 13,5 skotum að meðaltali í leik þrátt fyrir að taka flest þeirra í kringum körfuna. Högni viðurkennir alveg að hafa ekki verið ánægður með Ashley.

„Hún tekur ekki ábyrgð og var alltaf fyrsti leikmaðurinn til að gefast upp. Við hefðum þurft leikmann sem hefði rifið upp hinar stelpurnar í liðinu," segir Högni sem ætlar að byrja með Ashley á bekknum á móti Grindavík í kvöld en býst þó við að hún spili eitthvað.

Snæfellsliðið tapaði botnslagnum á móti Fjölni á mánudagskvöldið og er eina lið deildarinnar án sigurs. Högni segir samt ekki vera að leita að nýjum erlendum leikmanni til þess að fylla í skarð Detru.

„Það er ekki að koma nýr leikmaður að svo stöddu. Við ætlum allavega að spila útlendingalausar eitthvað fram í janúar," segir Högni sem er með mjög ungt lið enda var Ashley aðeins annar tveggja leikmanna liðsins sem er fædd á níunda áratugnum. Restin af liðinu eru stelpur fæddar eftir 1990.

Tölfræði Detru Ashley í Iceland Express deild kvenna 2008/09:

Mínútur í leik: 35,7

Stig í leik: 16,2

Fráköst í leik: 14,8

Stoðsendingar í leik: 2,0

Stolnir boltar í leik: 3,8

Skotnýting: 31,3% (118/37)

3ja stiga skotnýting: 20,0% (25/5)

Vítanýting: 66,7% (27/18)

Framlag í leik: 18,7