Frábær 4. leikhluti tryggði Njarðvík sigur

Njarðvíkingar hófu titilvörnina í Iceland Express-deildinni með sigri á KR-ingum á heimavelli í kvöld, 99-78. Íslandsmeistararnir sýndu mátt sinn í fjórða og síðasta leikhlutanum með því að sigra KR-inga með 23 stiga mun, en staðan eftir þriðja leikhluta var 72-70, gestunum í vil. Njarðvík er því komið með 1-0 forystu í einvíginu.

Leikurinn í kvöld var mjög sveiflukenndur. Heimamenn í Njarðvík voru talsvert sterkari í fyrri hálfleik og leiddu með 14 stigum í hálfleik, 58-44. Vesturbæingar sýndu hins vegar frábæran leik í 3. leikhluta og náðu að komast yfir, 72-70. Njarðvíkingum héldu hins vegar engin bönd í síðasta leikhlutanum, eins og áður segir, og tryggði liðið sér þar sannfærandi sigur. KR-ingar skoruðu aðeins 6 stig í síðasta leikhlutanum.

“Við áttum frábæran kafla í 3. leikhluta en einhverra hluta vegna hrundi þetta hjá okkur í 4. leikhluta. Við tökum þetta á fimmtudaginn og ætlum okkur að jafna þetta einvígi strax,” sagði Benedikt Guðmundsson, þjálfari KR.

“Við vorum að spila mjög vel í fyrri hálfleik en vorum værukærir í upphafi þessi seinni. Sem betur fer kom þetta í lokaleikhlutanum,” sagði Einar Árni Jóhannsson, þjálfari Njarðvíkur. “Við getum ennþá bætt okkur og við ætlum okkur að taka næsta leik. Við höfum verið mjög lélegir í leik númer 2 í einvígunum hingað til og nú er það áskorun fyrir okkur að breyta þeirri þróun,” sagði Einar Árni.

Jeb Ivey var stigahæstur Njarðvíkinga í kvöld með 24 stig, Brenton Birmingham skoraði 21 stig og Igor Beljanski 20 stig. Hjá KR var Tyson Patterson með 20 stig en Brynjar Þór Björnsson skoraði 18 stig.