PS3 í verslanir á föstudag

PlayStation 3, nýjasta leikjatölvan frá Sony, kemur í verslanir í Evrópu á föstudag. Tölvan fór í sölu í Japan og í Bandaríkjunum um miðjan nóvember í fyrra. Breskir fjölmiðlar segja leikjatölvuunnendur þar í landi jafnt sem annars staðar bíða óþreyjufullir eftir tölvunni. Helst gagnrýna Bretarnir verðið, sem er um 16.000 krónum hærra í Bretlandi en í Bandaríkjunum.

Leikjatölvan kostar um 425 pund út úr búð í Bretlandi. Það jafngildir tæpum 56.000 íslenskum krónum. Til samanburðar kostar tölvan í Bandaríkjunum jafnvirði um 40.000 króna. Það fer allt eftir innihaldi tölvunnar og eiginleikum. Þær minni eru ódýrari en stóru og öflugu útgáfur hennar eru eðlilega dýrari.

PlayStation 3 leikjatölvan er sú síðasta í kynslóð þriggja nýrra leikjatölva til að koma á markað. Hinar eru XBox360 frá Microsoft og Wii-leikjatölvan frá Nintendo, sem vermt hefur toppsætið yfir mest seldu nýju leikjatölvurnar frá útgáfudegi.

Ástæðan fyrir því að markaðssetning á nýju leikjatölvunni frá Sony dróst svo mjög er sú að tafir urðu í framleiðslu á Blu-ray drifi tölvunnar fyrir Evrópumarkað.