Verðmiði kominn á neysluhegðun

Vdeca er tæplega tveggja ára fyrirtæki sem markaðssetur og selur afnotaleyfi á einkaleyfisvernduðum ferlum. Fyrirtækið hefur einkaleyfi á ferlunum í 20 löndum í Evrópu og í Bandaríkjunum og tekur mið af lagaákvæðum persónuverndarlaga og ákvæðum laga um gagnaöryggi.

Þetta er algjör nýjung á markaði þar sem fyrirtæki geta tengt saman persónusniðnar upplýsingar um kaup- og neysluhegðun einstaklinga við vörur fyrirtækisins.

Þorsteinn Geirsson, framkvæmdastjóri Vdeca og einn stofnenda þess, segir að með tengingu persónuupplýsinga, aldurs kyns, áhugasviðs, tekna og fleira, við neysluhegðun þurfi að fara fram ferill sem nefnist upplýst samþykki.

„Eigandi upplýsinganna, einstaklingurinn, þarf að gefa leyfi fyrir því að upplýsingar hans verði notaðar í ákveðnum tilgangi,“ segir hann og bendir á að í persónuverndarlöggjöfinni sé þetta skrifað í stein. „Og þar sem búið er að einkaleyfavernda ferilinn þá þurfa fyrirtæki sem vilja nálgast upplýsingar sem þessar að gera það í gegnum okkur með einum eða öðrum hætti,“ segir hann og bætir við að geri þeir það ekki sé viðkomandi fyrirtæki að brjóta einkaleyfi.

Upplýsingar um kauphegðun einstaklinga eru mjög verðmætar fyrir mörg fyrirtæki, ekki síst lyfjaframleiðendur sem búa ekki yfir neinum tólum fyrir markaðssetningu á lyfseðilsskyldum lyfjum, að sögn Þorsteins.

„Viðskiptavinir apóteka verða að gefa upplýst samþykki fyrir notkun upplýsinganna og lyfjaframleiðendur geta síðan veitt þeim punkta eða afslátt af vörum í staðinn,“ segir Þorsteinn og bendir á að ferlar sem þessir auki mjög hagræði við lyfjaframleiðslu og geti sparað hinu opinbera allt að 700 milljónir á ári.