Mennt­skælingar rassskelltir

Vakningadagar fjölbrautarskólans Flensborg hafa staðið yfir í þessari viku. Morfís-lið skólans skoraði á þrjá gamla nemendur í ræðukeppni en urðu að láta í lægra haldi fyrir gömlu kempunum.

Ræðulið hinna eldri var skipað þremur þjóðþekktum einstaklingum sem allir eru frægir fyrir að vera með munninn fyrir neðan nefið. Radíusbræðurnir Davíð Þór Jónsson og Steinn Ármann Magúnsson ásamt Einari Sveinbjörnssyni voru síður en svo ryðgaðir í ræðustólnum þótt nokkuð væri liðið síðan að þeir stigu síðast í pontu. Umræðurefnið var hvort breyta ætti Vestmannaeyjum í fanganýlendu og fengu þeir sem eldri voru að vera á móti en hinir yngri með.

„Við snýttum þessum drengjum. Þeir töluðu um okkur sem gamla liðið en hefðu betur sleppt því. Þeir voru rassskelltir," segir Steinn Ármann sem var nokkuð rogginn eftir keppnina enda var ekki fyrirfram búist við því að þeir sem eldri væru stæðu uppí hárinu á yngri kynslóðinni. En það fór á annan veg. „Davíð var bestur, Einar gríðarlega rökfastur en ég var fyndnastur," útskýrir Steinn sem var þó bara rétt að hitna þegar ræðutímanum var lokið

„Við létum þá bara vaða yfir okkur," segir Freyr Árnason, liðstjóri ræðuliðs Flensborgarskólans og oddviti nemendafélagsins. Hann sagði að liðið sitt hefði nú tekið þessari keppni frekar létt. „Ég verð hins vegar að viðurkenna ósigurinn," segir Freyr. „Við tókum þetta ekki nógu alvarlega enda var þetta ekki uppá líf og dauða," bætir hann við. „Þeir tóku þessu hins vegar mjög alvarlega," bætir Freyr við og hlær.

Oddvitinn segir að Vakningadagarnir hafa gengið vonum framar en miklu balli var slegið uppí gærkvöldi en þar léku Milljónamæringarnir og Rottweilerhundarnir fyrir dansi.