Tveggja mánaða dómur fyrir kannabisrækt

Karlmanns á fimmtugsaldri bíður tveggja mánaða fangelsi en hann var í Héraðsdómi Reykjavíkur í dag sakfelldur fyrir fíkniefnabrot með því að hafa í vörslu sinni 2,5 grömm af hassi og kannabisræktun.

Hassið og fimm kannabisplöntugræðlingar fundust við húsleit hjá manninum en hann játaði á sig brotin. Með broti sínu nú rauf hann skilorð vegna sams konar brots sem hann var dæmdur fyrir í október og í ljósi þess þótti tveggja mánaða fangelsi hæfileg refsing. Þá var hassið og græðlingarnir gerðir upptækir.