Maccabi er hörkulið

Peter Crouch, hinn leggjalangi markaskorari Liverpool, sagði að leikmenn Maccabi Haifa hefðu ekki verið nein lömb að leika sér við eftir að liðin skildu jöfn í síðari leik sínum í forkeppni meistaradeildar Evrópu.

"Þetta var gríðarlega erfiður leikur og lið Maccabi var sannarlega erfiður andstæðingur. Þetta var kannski ekki mjög fallegur sigur hjá okkur en við erum komnir áfram," sagði Crouch og hrósaði vængmönnunum Mark Gonzales og Jermaine Pennant fyrir framlag sitt í kvöld.

"Það er mikilvægt fyrir leikmenn eins og mig að vera með tvo öfluga vængmenn og þetta er bara spurning um að ná að koma sér inn í teiginn. Það er ljóst að það verður samkeppni um framherjastöðurnar hjá okkur á næstunni og ég kem til með að þrífast við þær aðstæður," sagði Crouch.