Rakel búin að skora tvö mörk í toppslagnum

Rakel Logadóttir er búin að koma Valsstúlkum í 2-0 í toppslag Landsbankadeildar kvenna milli Vals og Breiðabliks sem fram fer þessa stundina á Valbjarnarvelli í Laugardal. Rakel skoraði fyrra markið á 13. mínútu leiksins eftir góðan undirbúning Violu Odebrecht sem er að leika sinn fyrsta leik með Valsliðinu og seinna markið skoraði Rakel síðan á 30. mínútu eftir sendingu Dóru Maríu Lárusdóttur.

Valur og Breiðablik hafa bæði unnið þrjá fyrstu leiki sína á tímabilinu og leikurinn í dag er að flestra mati annar tveggja úrslitaleikja tímabilsins en hinn er síðan seinni innbyrðisleikurinn liðanna í seinni umferðinni.

Rakel Logadóttir er á skotskónum þessa daganna en hún skoraði þrennu fyrir Valsliðið í síðasta leik, 10-0 sigri á Fylki og hefur skorað alls sex mörk á tímabilinu.