Blackburn lagði Chelsea

Blackburn tryggði sér í kvöld Evrópusæti þegar liðið lagði Englandsmeistara Chelsea 1-0 á heimavelli sínum Ewood Park. Blackburn tryggði sér 6. sæti deildarinnar með sigrinum og er nú aðeins einu stigi frá Arsenal í 5. sætinu en Arsenal á leik til góða. Það var varnarmaðurinn Steven Reid sem skoraði eina mark leiksins í 43. mínútu.

Eiður Smári Guðjohnsen var í byrjunarliði Chelsea og átti meðal annars stangarskot í leiknum, en inn vildi boltinn ekki hjá Chelsea og því nældu lærisveinar Mark Hughes í enn einn sigurinn í deildinni og hefur liðið komið mjög á óvart með árangri sínum í vetur.