Vill veiðibann á loðnuna

Loðnuveiðar á að stöðva og setja á veiðibann strax, sagði Magnús Þór Hafsteinsson, varaformaður Frjálslynda flokksins, við upphaf þingfundar. Hann sagði ástand loðnustofnsins grafalvarlegt og vildi að hætt yrði að veiða það litla sem finndist við loðnuleit.

Magnús Þór sagði að leita mætti að loðnu án þess að veiða hana eins og nú væri gert. Hann sagði fulla ástæðu til að breyta aðferðum við leitina.

Einar K. Guðfinnsson sjávarútvegsráðherra sagði ekki ástæðu til að breyta þeim aðferðum sem notaðar eru við loðnuleit og sagði fulla ástæðu til að herða leitina að loðnunni. Hann sagði þó ekki ástæðu til að örvænta og vísaði í þeim efnum til samtala sinna við skipstjóra sem taka þátt í loðnuleitinni.

"Við verðum að herða okkur við leitina, við verðum að aflétta þessu óvissuástandi. Það er það sem menn hafa verið að gera," sagði sjávarútvegsráðherra.